រាជធានីភ្នំពេញ៖ ក្រសួងអប់រំ យុវជន និងកីឡា បានលើកពេល ប្រឡងសញ្ញាបត្រមធ្យមសិក្សាបឋមភូមិ (ឌីប្លូម) ដែលគ្រោងធ្វើនៅថ្ងៃទី១៦-១៧ ខែកញ្ញា ទៅធ្វើនៅថ្ងៃទី២៦-២៧ ខែកញ្ញា វិញ។ មូលហេតុនៃការលើកពេលនេះ ក្រសួងមិនបានបញ្ជាក់នោះទេ តែការប្រកាសលើកពេលទាំងតក់ក្រហល់នេះបង្កជាកង្វល់ដល់បេក្ខជនជាង១២ម៉ឺននាក់ និងគណៈមេប្រយោគទូទាំងប្រទេសផងដែរ។
តាមសេចក្តីប្រកាសរបស់ក្រសួងអប់រំ យុវជន និងកីឡា កាលពីថ្ងៃទី១៥ ខែកញ្ញា បានជម្រាបជូនដំណឹងដល់មាតា បិតា អាណាព្យាបាលសិស្សានុសិស្ស ទាំងអស់ថា ការប្រឡងមធ្យមសិក្សាបឋមភូមិ ដែលគ្រោងធ្វើនៅថ្ងៃទី១៦-១៧ ខែកញ្ញា ត្រូវលើកពេលទៅថ្ងៃទី២៦-២៧ ខែកញ្ញា វិញ។
ការសម្រេចលើកពេលនៃការប្រឡងឌីប្លូមរបស់ក្រសួងអប់រំ យុវជន និងកីឡា មិនត្រូវបានថ្នាក់ដឹកនាំក្រសួង បញ្ជាក់ពីមូលហេតុច្បាស់លាស់នោះទេ។ ទោះបីជាយ៉ាងណា សាធារណជនទូទៅលើកឡើងថា ការលើកពេលប្រឡងនេះ គឺជាប់ពាក់ព័ន្ធនឹងមហាបាតុកម្មរបស់គណបក្សសង្គ្រោះជាតិដែលមានទ្រង់ទ្រាយធំ និងបង្កឲ្យមានហិង្សាការប៉ះទង្គិចគ្នារហូតមានអ្នករងរបួសនោះ។
គណៈមេប្រយោគគ្រប់ថ្នាក់ មន្ត្រីអប់រំស្ទើរគ្រប់មុខតំណែងដែលត្រៀម ចូលរួមក្នុងដំណើរការវិញ្ញាសាប្រឡងក្នុងមណ្ឌលសំណេរ(ពេលសិស្សប្រឡង )លើកលែងតែគណៈមេប្រយោគ ជាអ្នកធ្វើកំណែបែងចែកសន្លឹកកិច្ចការ, បូកស្រង់-គូសជាប់ធ្លាក់នៃដំណើរការមណ្ឌលកំណែ គឺបានរិះគន់ការលើកពេលនេះយ៉ាងប្រថុចញ៉ុច គឺ ដំណឹងបានដឹងសុសសាយនៅតែប៉ុន្មាននារីមុនការប្រជុំគណៈមេប្រយោគតាមមណ្ឌលនីមួយៗនៅរសៀលម៉ោង២នាថ្ងៃទី១៥ កញ្ញា ដំណើរការតែប៉ុណ្ណោះ។
បេក្ខជនជាច្រើននៅរាជធានីភ្នំពេញនិយាយថា ការធ្វើបែបនេះនាំឲ្យពួកគេចេះតែបារម្ភ ភ័យ បើជាប់ត្រូវចូលរៀនក្រោយគេ មិនទាន់កម្មវិធី។ ចំណែកមន្ត្រីអប់រំក៏លំបាកក្នុងការធ្វើការ ព្រោះប្រតិទិនការងារមានជាស្រេច បើពន្យារពេលការងារមួយនឹងប៉ះពាល់ការងារមួយទៀត ហើយក៏លំបាកក្នុងការរៀបចំថ្នាក់ សេវាប្រចាំសប្តាហ៍ និងការអនុវត្តកម្មវិធីសិក្សាជាដើម។
ទោះបីជាយ៉ាងណា ការពន្យារពេលនេះទំនងជាធ្វើឡើងក្នុងបំណងជួយរក្សាសន្តិសុខ និងសុវត្ថិភាព ជូនបេក្ខជនជាសិស្សានុសិស្ស ក៏ដូចជាគណៈមេប្រយោគទាំងអស់ជាពិសេសសិស្សដែលត្រូវចេញ ទៅប្រឡងក្នុងរាជធានីភ្នំពេញ។ នៅរាជធានីភ្នំពេញ មានបេក្ខជនប្រឡងចំនួន១៦៦៣៥នាក់ មាន៣៧មណ្ឌល ។
សូមរំឭកថា សិស្សានុសិស្សចំនួនជាង១២ម៉ឺននាក់ នៅទូទាំងប្រទេសត្រូវប្រឡងសញ្ញាបត្រមធ្យមសិក្សាបឋមភូមិ(ឌីប្លូម)នៅថ្ងៃទី១៦ ខែកញ្ញា ឆ្នាំ២០១៣នេះ។ តាមគេហទំព័រក្រសួងអប់រំ យុវជន និងកីឡា សេចក្តីប្រកាសព័ត៌មានចុះថ្ងៃទី១២ កញ្ញា បានឲ្យដឹងថា ការប្រឡងសញ្ញាបត្រមធ្យមសិក្សាបឋមភូមិចំណេះទូទៅ និងបំពេញវិជ្ជា(ឌីប្លូម)ប្រព្រឹត្តទៅនៅថ្ងៃទី១៦ ខែកញ្ញា ឆ្នាំ២០១៣នេះ ដេលមានបេក្ខជនចំនួន១២៦ ៤២៨នាក់ និងមានមណ្ឌលប្រឡងចំនួន៣៨០មណ្ឌល ដែលចែកចេញជា៥២៤៤បន្ទប់ នៅរាជធានី ខេត្តទាំង២៤ នៃព្រះរាជាណាចក្រកម្ពុជា។ ការប្រឡងនេះនឹងត្រូវប្រកាសលទ្ធផលនៅរសៀលថ្ងៃទី២៨ ខែកញ្ញា ឆ្នាំ២០១៣ នៅតាមមណ្ឌលសំណេរនីមួយៗ។
សូមបញ្ជាក់ថា ជាទូទៅការប្រឡងសញ្ញាបត្រមធ្យមសិក្សាបឋមភូមិចំណេះទូទៅ និងបំពេញវិជ្ជា(ឌីប្លូម)ធ្លាប់ប្រព្រឹត្តទៅនៅខែកក្កដា មុនការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប)តែត្រូវបានលើកពេលមកធ្វើនៅថ្ងៃទី១៦ ខែកញ្ញា ឆ្នាំ២០១៣នេះ ដោយសារតែខែកក្កដា ចំរដូវបោះឆ្នោតជ្រើសរើសតំណាងរាស្ត្រអាណត្តិទី៥ ឥឡូវលើកពេលពីថ្ងៃទី១៦ ខែកញ្ញា ទៅរៀបចំនៅថ្ងៃទី២៦ ២៧ ខែកញ្ញា ឆ្នាំ២០១៣ សប្តាហ៍ក្រោយនេះវិញ៕
0 comments:
Post a Comment